ამერიკის შეერთებულ შტატებს საქართველოს თავისუფლებისკენ მიმავალ გზაზე არ უღალატია, ხოლო რუსეთი კი დიდი ხანია „ღიად გვეომება“, განაცხადა ბოდბელმა ეპისკოპოსმა, მეუფე იაკობმა ვაშინგტონში სამაუწყებლო კომპანია „რუსთავი 2“-თან საუბრისას.

„ძალიან ბევრი საინტერესო ადამიანი გავიცანით. ძალიან ბევრ რამეს სხვა თვალით შევხედეთ და ყველაზე დიდი მნიშვნელობა ამ ვიზიტს იმიტომ ჰქონდა, რომ ნახოს ამერიკამ, ჩვენმა სტრატეგიულმა და ჯერჯერობით ის ქვეყანაა, ღმერთმა სხვებიც ამრავლოს და... ის ქვეყანაა, რომელსაც ჩვენთვის არ უღალატია იმ გზაზე, რომლისთვისაც... ჩვენი თავისუფლების გამო, თავისუფლებისკენ მისწრაფების გამო, რამდენი წელია რუსეთი ღიად გვეომება, ხომ?! ამიტომ ამერიკის მხარდაჭერა ჩვენთვის ძალიან მნიშვნელოვანია და ნახეს, რომ ეკლესიაც ისე ვართ, რომ არ ვაპირებთ ჩვენ მოწინააღმდეგეებთან რამეს დათმობაზე წასვლას. თავისუფლების გაყიდვა არაფრად არ გვიღირს“, განაცხადა მეუფე იაკობმა (სტილი დაცულია).

წმინდა სინოდის წევრები ვაშინგტონში „დემოკრატიის ეროვნული ფონდის“ მიერ ორგანიზებულ კონფერენციაში მონაწილეობდნენ. აღნიშნული კონფერენციის ერთ-ერთი მთავარი თემა კი რუსული პროპაგანდა და დეზინფორმაცია იყო.

უფრო ადრე მიცემულ ინტერვიუში ბოდბელმა ეპისკოპოსმა თქვა, რომ „ერთადერთი შემაკავებელი ფაქტორი იმისა, რომ ჩვენი ტერიტორიების ოკუპაცია არ მოხდეს, არის შეერთებული შტატები - ჩვენი სტრატეგიული პარტნიორი“.