"ქართული ოცნების" ოფისთან ფრაქციის წევრებისა და პრემიერ მინისტრის, გიორგი კვირიკაშვილის შეხვედრის პარალელურად "რესპუბლიკური პარტიის" საწინააღმდეგო აქცია მიმდინარეობს, რომელსაც 10-მდე არასამთავრობო ორგანიზაცია მართავს.

აქციაზე გამოტანილი აქვთ რამდენიმე პლაკატი, წარწერებით: "პარლამენტი რესპუბლიკელების გარეშე", "დაითხოვეთ მუქთახორა, არაფრისმაქნისი პარლამენტი", "არასამთავრობოები რესპუბლიკელების წინააღმდეგ", "მიდი გოგი, მიაწექი".

აქციაზე ათამდე არასამთავრობო ორგანიზაციაა წარმოადგენილი, მათ შორის "საქართველოს საბანკო და სამევახშეო სისტემით დაზარალებულთა უფლებების დაცვის კომიტეტი", "საქართველოში სოციალურად დაუცველ მოქალაქეთა დაცვის კომიტეტი", "უძრავი ქონების დაცვის კომიტეტი", "მომავლის გზა", "ინდვიდუალურ მესაკუთრეთა კავშირი", ადამიანის უფლებების დაცვის და დახმარების საერთაშორისო კავშირი "ნდობა", სახალხო მოძრაობა "მესამე გზა". ისინი "რესპუბლიკელებს" ანტიქართულ და ანტისახელმწიფოებრივ ქმედებებში ადანაშაულებენ, ხოლო დეპუტატ გოგი თოფაძეს მხარდაჭერას უცხადებენ. .

დეპუტატ ნუკრი ქანთარიას განცხადებით, ფრაქცია "ქართული ოცნების" წევრების პრემიერ მინისტრთან შეხვედრაზე გოგი თოფაძესა და "რესპუბლიკელებს" შორის არსებული დაპირისპირება შესაძლოა მხოლოდ ერთ-ერთ რიგით საკითხად იყოს განხილული.

"არ მგონია ეს საკითხი იყოს, შეიძლება ერთ-ერთ თემად გაიელვოს. თუმცა, ერთი ლოზუნგი ამ აქციაზე მომწონს. "მიდი, გოგი, მიაწექი", - კარგია", - განაცხადა ნუკრი ქანთარიამ.