ნინოწმინდის და ახალქალაქის მაჟორიტარმა დეპუტატმა ახალქალაქში ადგილობრივი თვითმმართველობის ხელმძღვანელობასთან, ახალქალაქის მუნიციპალიტეტის მერ იური უნანიანთან და სხვა პირებთან შეხვედრა გამართა, რომელზეც სამშენებლო სფეროში განსახორციელებელი პრიორიტეტული სამუშაოების შესახებ იმსჯელეს.

როგორც ენზელ მკოიანმა განაცხადა, სამშენებლო სამუშაოების შესახებ რეგიონული განვითარებისა და ინფრასტრუქტურის მინისტრს ესაუბრა და მიმდინარე წელს საქართველოს მასშტაბით დაგეგმილია 60 სკოლის კაპიტალური რეკონსტრუქცია, მათ შორის 5 სკოლა ნინოწმინდისა და ახალქალაქის მუნიციპალიტეტებში აღდგება, საუბარია ზარვეთის, დილისკის, ახალქალაქის #3, ნინოწმინდის #1 სკოლებზე. სკოლების მშენებლობის ტენდერები 10,15 ივნისს გამოცხადდება.

ენზელ მკოიანის ინფორმაციით, გარდა ამისა ნინოწმინდისა და ახალქალაქის მუნიციპალიტეტებში დაგეგმილია 22 საჯარო სკოლის სარეაბილიტაციო სამუშაოები, წყალმომარაგების სისტემის მოწესრიგება და სხვა სამშენებლო სამუშაოები - სკოლების მოთხოვნებისა და საჭიროებების მიხედვით.

ენზელ მკოიანის თქმით, პრიორიტეტული არის გზის მოასფალტების სამუშაოები. დაწეყბულია ახალქალაქი-ნინოწმინდის მაგისტრალის მოასფალტების სამუშაოები, ნინოწმინდა- ორლოვკა, ოკამის მიმართულებით, მამწვარა-დილიფი და სხვა გზების მონაკვეთების მოასფალტება.

ქვეყანაში არსებული მდგომარეობის გამო დაგეგმილი სამუშაოები მოგვიანებით დაიწყეს, თუმცა მშენებლები პირობას იძლევიან, რომ მითითებულ დროზე ადრე ჩააბარებენ აღნიშნულ სამუშაოებს.

შეხვედრის შემდეგ მკოიანმა ბიუროში მოქალაქეების ტრადიციად ქცეული მიღება გამართა.