1989 წლის 9 აპრილის ტრაგედიიდან 30 წელი გავიდა. თერჯოლის მუნიციპალიტეტის მერმა, ბონდო სოფრომაძემ და საკრებულოს თავმჯდომარემ, ნინო ჯანელიძემ მუნიციპალიტეტის სხვა ხელმძღვანელ პირებთან ერთად, 9 აპრილის მემორიალი გვირგვინებით შეამკეს და პატივი მიაგეს საქართველოს დამოუკიდებლობისათვის დაღუპულ გმირთა ხსოვნას.

მემორიალთან ჩატარდა პერფორმანსი თერჯოლის მოსწავლე-ახალგაზრდობის სახლის აღსაზრდელებისა და ანსამბლების მონაწილეობით, ხოლო დეკანოზმა სპირიდონ ცქიფურიშვილმა 9 აპრილს გარდაცვლილთა სულის მოსახსენიებელი პანაშვიდი გადაიხადა.

შეკრებილ საზოგადოებას მიმართა თერჯოლის მუნიციპალიტეტის მერმა ბონდო სოფრომაძემ, რომელმაც, როგორც 9 აპრილის მოვლენების მონაწილემ, გაიხსენა იმ დღეების ქრონიკა, ქართველი ხალხის ერთიანობისა და გმირობის მაგალითები და წუთიერი დუმილით პატივი მიაგო დაღუპულ გმირთა ხსოვნას.

1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რის შედეგადაც 21 ადამიანი დაიღუპა, ხოლო პარლამენტის წინ შეკრებილი ათასობით მოქალაქე დაუდგენელი შემადგენლობის გაზით მოიწამლა.

ზუსტად 28 წლის წინ, 1991 წლის 9 აპრილს, საქართველოს უზენაესი საბჭოს თავმჯდომარემ, ზვიად გამსახურდიამ გამოაცხადა საქართველოს სახელმწიფოებრივი დამოუკიდებლობის აღდგენა, რითაც საფუძველი ჩაეყარა დამოუკიდებელი ქართული სახელმწიფოს მშენებლობას.

9 აპრილი - დღე, როდესაც მრავალი თაობა გაერთიანდა საქართველოს დამოუკიდებლობისთვის ბრძოლაში, ყოველთვის დარჩება სამშობლოს სიყვარულის, თავისუფლებისთვის ბრძოლის, თავგანწირვის სიმბოლოდ.

ინფორმაციას თერჯოლის მერიის პრესსამსახური ავრცელებს.