მიმდინარე წლის 17 იანვარს, გარდაბნის მუნიციპალიტეტის 3 სოფელში: სართიჭალაში (მუღანლო), ახალ სამგორსა და გამარჯვებაში სოფლის მხარდაჭერის პროგრამის განსახორციელებლად დასაფინანსებელი პროექტების შესარჩევად, მოსახლეობასთან კონსულტაციები გაიმართა.

ადგილზე იმყოფებოდნენ გარდაბნის მუნიციპალიტეტის მერი რამაზ ბუდაღაშვილი, საკრებულოს თავმჯდომარე ტარიელ ჯანხოთელი, მერის მოადგილე რევაზ ეგაძე, მერის მოადგილე დუნიამალ გაჯიევი და ადგილობრივი თვითმმართველობის სხვა ხელმძღვანელი პირები.

გარდაბნის მუნიციპალიტეტის მერიის პრესსამსახურის ცნობით, შეხვედრებზე მოსახლეობის მიერ ინიცირებული პროექტები განიხილეს და გადაწყვეტილებები მიიღეს:

სოფელი სართიჭალა - საბავშვო ბაღების ეზოების კეთილმოწყობა.

სოფელი მუღანლო - საბავშვო ბაღის ეზოს კეთილმოწყობა.

სოფელი ახალი სამგორი - შიდა სარწყავი სისტემების რეაბილიტაცია.

სოფელი გამარჯვება - კულტურის სახლის ეზოს შემოღობვა.

მერის განცხადებით, აღნიშნული პროექტების თანადაფინანსება გარდაბნის მუნიციპალიტეტის ადგილობრივი ბიუჯეტიდან მოხდება.

პროგრამის ფარგლებში დასაფინანსებელი პროექტები განსაზღვრულია და მათ შორისაა - სასმელი წყლის და სარწყავი სისტემების, სანიაღვრე არხების მოწესრიგება;

ნაპირსამაგრი სამუშაოები; გზების და ხიდების მოწესრიგება; გარე განათების, სკოლების მიმდებარე ტერიტორიის, კულტურის ობიექტების, სპორტული ინფრასტრუქტურის, მოედნებისა და სკვერების მოწყობა და სხვა.