ბიზნესმენი ლევან ვასაძე „ფეისბუქის“ მეშვეობით გავრცელებულ ვიდეოში მოუწოდებს ხელისუფლებას, სასწრაფოდ გააუქმონ კაზინოები, აზარტული ონლაინ-თამაშები და ტოტალიზატორები საქართველოში, „ყოველგვარი გამონაკლისების გარეშე, გეოგრაფიული გამონაკლისების ჩათვლით“.

მისი განცხადებით, 2017 წელს „მანდ ქართველებმა წააგეს 4 მილიარდი ლარი“ და „ეს ფული რამდენიმე უნამუსო ბიზნესმენისა და მათი ლობისტი „ქოცი“ დეპუტატების, მათ შორის უცხოურ ანგარიშებზე დაილექა და ჩვენი ეკონომიკური ბრუნვიდან ამოღებული იქნა“.

„მაგ ფულით მათ მიერ აშენებული ორიოდე სასტუმრო და ნაყიდი ფუფუნების საგნები ვერაფერი კომპენსაციაა ეკონომიკის ამ კოლოსალური ზარალისათვის. დავანებოთ თავი იმ უბედურებას, რაც ამის გამო ქართულ ოჯახებში ტრიალებს. იცოდეთ, რომ თქვენ ამ სიბინძურის სრული აღკვეთის გარეშე, იმიგრაციის პრობლემას ვერ უშველით, გენაცვალე. გასაგებია, რომ მერე აზარტული თამაშების ნაწილი გადავა იატაკქვეშეთში , როგორც ეს ადრეც იყო, მაგრამ ჯერ ერთი, ის 99%-ით შემცირდება, ჩვენს ეკონომიკას ასეთ ზიანს აღარ მიაყენებს, ასიათასობით ოჯახს აღარ გააუბედურებს დ რაც ასევე მნიშვნელოვანია, საშუალებას მოგვცემს, არალეგალურ, აზარტულ თამაშებში მხილებული იმიგრანტები, ასევე კანონის ფარგლებში დააკავოთ და მათაც დეპორტაცია გაუკეთოთ“, აცხადებს ლევან ვასაძე თავის მორიგ ვიდეომიმართვაში, სადაც იგი მწვავედ უპირისპირდება ბიძინა ივანიშვილს.