„თერჯოლის მუნიციპალიტეტში 2016 წელს 7 დიდი ინფრასტრუქტურული პროექტის განხორციელება იგეგმება. მოხდება მუნიციპალიტეტის სოფლებს შორის დამაკავშირებელი გზებისა და წყალგაყვანილობის რეაბილიტაცია“ - ამის შესახებ guardian.ge-ს თერჯოლის მუნიციპალიტეტის გამგებელმა, თეიმურაზ ჯაფარიძემ განუცხადა.


ჯაფარიძის ცნობით, აღნიშნული პროექტების განხორციელება ცენტრალური, ხოლო თავად მუნიციპალიტეტის კეთილმოწყობა და წყლის გაყვანილობის რეაბილიტაცია ადგილობრივი ბიუჯეტის დაფინანსებით მოხდება.


„2016 წლის განმავლობაში მნიშვნელოვანი პროექტების განხორციელებას ვგეგმავთ. ჯერჯერობით გვაქვს 7 პროექტი, აქედან 6 ტენდერი უკვე გამოცხადებულია და უახლოეს დღეებში გახდება ცნობილი შედეგები, ერთ ტენდერში კი უკვე გვყავს გამარჯვებული.


ვიწყებთ ჩხარი-ალისუბნის დამაკავშირებელი გზის სარეაბილიტაციო სამუშაოების მეორე, დამამთავრებელ ეტაპს. მეორე ეტაპი იწყება ასევე ღვანკითი-ტელეფა-რუფოთის დამაკავშირებელ გზაზე. დაგეგმილია ძევრი-სიმონეთის გზის აღდგენა, აგრეთვე სოფელ გოგნიში, რომელიც ყველაზე მაღალი დასახლებული სოფელია მუნიციპალიტეტში, ბეტონის საფარის მოწყობა. წელს მოხდება ასევე თუზი-თავასას დამაკავშირებელი გზის აღდგენა, ეს გზა მოწყვეტილი იყო მთლიანად სტიქიების შედეგად. სოფლის პროგრამით ვიწყებთ ალისუბანი-ჩხარი-ძევრის წყალგაყვანილობის რეაბილიტაციას, ასევე სოფელ სიქთარვას წყალმომარაგების პრობლემის აღმოფხვრას,“ განაცხადა თეიმურაზ ჯაფარიძემ.


თერჯოლის მუნიციპალიტეტის გამგებლის თქმით, აღნიშნული პროექტების გარდა, დაგეგმილია კიდევ 1,5 მილიონიანი პროექტის განხორციელება, საამისოდ კი უკვე დაწყებულია მოლაპარაკებები ერთ-ერთ საერთაშორისო საფინანსო ორგანიზაციასთან. „ვგეგმავთ სოფელ ღვანკითის წყალმომარაგების პრობლემის მოგვარებას. დაწყებულია მოლაპარაკებები მსოფლიო ბანკთან, პროექტი მოწონებულია და თუ გადაწყდა დაფინანსება და მოავახერხეთ მთლიანი სოფლის წყალმომარაგება, ეს ძალიან დიდი წინ გადადგმული ნაბიჯი იქნება. აქვე მინდა აღვნიშნო, რომ თავად თერჯოლის ტერიტორიაზე სტიქიის დროს ჩამოწვა მეწყერი, ერთი უბანი მთლიანად მოწყვეტილია, მოვითხოვეთ უკვე 200 000 ლარი და თუ ბიუჯეტიდან ეს თანხა გამოიყოფა, ამ უბანსაც მივხედავთ. ახლახან დასრულდა ასევე მუნიციპალიტეტის 5 საბავშვო ბაღის სარემონტო სამუშაოები, ადგილობრივი ბიუჯეტიდან გამგეობამ ბაღებისთვის შეიძინა ავეჯი და რამდენიმე დღეში თერჯოლას 5 ახალი საბავშვო ბაღი ექნება,“ აღნიშნა თეიმურაზ ჯაფარიძემ და დაამატა, რომ გაზაფხულზე იმერეთის რეგიონში და მათ შორის თერჯოლის მუნიციპალიტეტში ევროპიდან დელეგაციის ჩამოსვლას ელოდებიან.


„ველოდებით, ჩვენს ევროპელ კოლეგებს. დაგეგმილია თერჯოლის მუნიციპალიტეტისა და ლატვიის რესპუბლიკის რეგიონებს შორის დამეგობრება. აღნიშნულის ფარგლებში, მეტი ყურადღება მიექცევა სოფლის მეურნეობას, უფრო კონკრეტულად კი მეფუტკრეობას“ - განაცხადა თეიმურაზ ჯაფარიძემ guardian.ge-სთან საუბრისას.


თერჯოლის მუნიციპალიტეტში, 2016 წლის განმავლობაში განსახორციელებელი ინფრასტრუქტურული პროექტები მარტის ბოლოს დაიწყება, დასრულება კი ივლისის ბოლოსკენ იგეგმება.