„საერთაშორისო მნიშვნელობის თბილისი-სენაკი-ლესელიძის საავტომობილო გზის თერჯოლის დაზიანებული მონაკვეთის აღდგენა სულ მცირე 3-4 დღე ვერ მოხერხდება“ - ამის შესახებ guardian.ge-ს თერჯოლის მუნიციპალიტეტის გამგებელმა, თეიმურაზ ჯაფარიძემ განუცხადა.

ჯაფარიძის თქმით, თერჯოლაში მდგომარეობა ამჟამად სტაბილურია, მუნიციპალიტეტმა, ინტენსიური მუშაობის შედეგად, დიდთოვლობით გამოწვეული ყველა პრობლემა აღმოფხვრა.

„ძლიერი წვიმისა და ინტენსიური თოვის გამო, საერთაშორისო მნიშვნელობის თბილისი-სენაკი-ლესელიძის მაგისტრალის თერჯოლის მონაკვეთი ძალიან არის დაზიანებული, მდინარე ჩხარამ, ფაქტობრივად, მთლიანად წაიღო გზა. სანამ წყლის დონე არ დაიწევს, ვერ დავიწყებთ აღდგენით სამუშაოებს. ჩემი ვარაუდით, აღდგენას 3-4 დღე მაინც დასჭირდება. რაც შეეხება მუნიციპალიტეტის ტერიტორიაზე დიდთოვლობის გამო შექმნილ შეფერხებებს, ამ დროისთვის ყველა პრობლემა არის აღმოფხვრილი. შიდა გზები გაწმენდილია, ელექტრომომარაგების მხრივაც არ გვაქვს პრობლემები, ყველა აბონენტს მიეწოდება ელექტროენერგია“ - აღნიშნა თეიმურაზ ჯაფარიძემ.

საერთაშორისო მნიშვნელობის თბილისი–სენაკი–ლესელიძის ორ მონაკვეთზე ავტოტრანსპორტის მოძრაობაზე სპეციალური რეჟიმია დაწესებული. დროებითი შემოვლითი გზის დაზიანების გამო, აიკრძალა ყველა სახის ავტოტრანსპორტის მოძრაობა.

ავტოტრანსპორტის ნაკადები გადართულია ზესტაფონი-ბაღდათი-ქუთაისის საავტომობილო გზაზე. აღნიშნული მიმართულებით მისაბმელიანი და ნახევრადმისაბმელიანი ავტოტრანსპორტის მოძრაობა აკრძალულია.