“ნაციონალური მოძრაობის” წევრი გიორგი კანდელაკი მისი მისამართით პრემიერ-მინისტრის ბრალდებას “ტყუილს” უწოდებს. კანდელაკი დარწმუნებულია, რომ “ასეთ ზღვარგადასულ სიცრუეს მოკლე ფეხები ექნება”.

“იმდენჯერ მოხდა ბატონ ღარიბაშვილის და მისი უშუალო უფროსის გამოჭერა ტყუილებში, რომ ამ შემთხევევაშიც ძალიან ადვილია მათი სიცრუის გამოაშკარავება. საქართველოს ევროპულ პერსპექტივას და უვიზო მიმოსვლის შესაძლებლობას აზიანებს, პირველ რიგში, მათი მთავრობის საქციელი და მათი მცდელობა, რომ ხელში ჩაეგდოთ და გაენადგურებინათ საქართველოში მკვეთრად გამოხატული პროდასავლური მედიასაშუალება “რუსთავი-2″. თუ არაფერი აქვს დასამალი ჩვენს მთავრობას, მაშინ რატომ მოითხოვა მისთვის სამარცხვინოდ საგარეო საქმეთა მინისტრმა ევროპარლამენტის საგარეო ურთიერთობათა კომიტეტის გუშინწინდელი სხდომის დახურვა, სადაც იგი კრიტიკის ქარცეცხლში გაატარეს?! გასაგებია, მას არ სურს, რომ ეს კრიტიკა გაიგოს ბიძინა ივანიშვილმა, მისმა უშუალო უფროსმა”, – აცხადებს კანდელაკი.