დღეს, 18 ნოემბერს, საქართველოს უსინათლოთა კავშირის კულტურის ცენტრში უსინათლოთათვის ხმოვანი ბიბლიოთეკის პროექტის პრეზენტაცია შედგა. პრეზენტაციას პარტია "მემარცხენე ალიანსის" ლიდერები კახა ძაგანია, სოსო შატბერაშვილი, პაატა ჯიბლაძე და არჩილ ბენიძე, ასევე უსინათლოთა კავშირის თბილისის ფილიალების წევრები, უსინათლო პირები ესწრებოდნენ.

როგორც guardian.ge-ს პარტიიდან აცნობეს, „მემარცხენე ალიანსმა“ უსინათლოებს მათთვის სპეციალურად შექმნილი ხმოვანი ბიბლიოთეკა საჩუქრად გადასცა. როგორც პრეზენტაციაზე ითქვა, უსინათლოთა კავშირმა თხოვნით მიმართა მათ ხმოვანი ბიბლიოთეკის პროექტის განხორციელების შესახებ.

"მემარცხენე ალიანსის" გენერალური მდივნის, სოსო შატბერაშვილის განცხადებით, პროექტის განსახორციელებლად 8 000 ლარამდე თანხა მეცენატმა გამოყო, რომელიც მათი პარტიის წევრია და საკუთარი ვინაობის გამხელას არ თვლის საჭიროდ. კახა ძაგანიამ კი შეხვედრაზე მისულ უსინათლოებს მოუწოდა შეატყობინონ პროექტის შესახებ ყველას, რათა რაც შეიძლება მეტმა პირმა ისარგებლოს ხმოვანი ბიბლიოთეკით.

ამ პროექტის ფარგლებში ასევე ხელი მოეწერა ურთიერთთანამშრომლობის მემორანდუმს.