GUARDIAN.GE - დიდი ბრიტანეთის პრემიერ-მინისტრმა ბორის ჯონსონმა, როემელიც ვარშავაში მთავარ ევროპელ მოკავშირეებთან საგანგებო შეხვედრებისთვის ჩავიდა, პოლონეთის პრემიერ-მინისტრთან ერთად გამართულ პრესკონფერენციაზე განაცხადა, რომ „ნათელია, პუტინი მზად არის გამოიყენოს ბარბაროსული და განურჩეველი ტაქტიკა მშვიდობიანი მოქალაქეების წინააღმდეგ; დაბომბოს საცხოვრებელი კორპუსები; გაგზავნოს რაკეტები საცხოვრებელ კორპუსებში ბავშვების მოსაკლავად“.

მისი თქმით, პუტინმა სათანადოდ ვერ შეაფასა უკრაინელი ხალხის „მგზნებარე სურვილი“ დაიცვას თავისი ქვეყანა. მან ასევე შეაქო უკრაინის ხელმძღვანელობა და პრეზიდენტ ზელენსკის „სიმამაცე“, რომელმაც მისი განცხადებით, რუსეთის შეჭრის წინააღმდეგ თავისი ქვეყნის და მსოფლიოს მობილიზება მოახდინა.

ჯონსონმა აღნიშნა, რომ პუტინმა ასევე ვერ შეაფასა სათანადოდ დასავლეთის „ერთიანობა და სიმტკიცე“ და დაამატა, რომ დასავლეთი ყველაზე მძლავრი სანქციების მეშვეობით შეინარჩუნებს „ეკონომიკურ ზეწოლას“ რუსეთზე, რასაც უადვოდ ექნება ეფექტი.