ტყიბულის შახტში აფეთქებას 1 პირი ემსხვერპლა, დაშავებულია 8 ადამიანი. თავდაპირველად დაშავებულები ტყიბულის რაიონულ საავადმყოფოში მოათავსეს, საიდანაც ისინი სასწრაფო სამედიცინო დახმარების ჯგუფებმა თბილისში, ხეჩინაშვილის კლინიკაში გადაიყვანეს. 

„9 პაციენტი შემოიყვანეს. სუყველას ჰქონდა სხეულის სხვადასხვა მიდამოს დამწვრობა, სხვადასხვა ხარისხის. აქედან ერთი იყო მძიმე, ფაქტობრივად, რომ შემოიყვანეს, გული აღარ მუშაობდა. გადავიყვანეთ ხელოვნურ სუნთქვაზე, გაუკეთდა ყველა რეანიმაციული ღონისძიება, მაგრამ სამწუხაროდ, დაიღუპა. დანარჩენ 8 პაციენტს პირველადი დახმარება აღმოუჩნდა და სუყველა გადაყვანილი იქნა თბილისში, დამწვრობის ცენტრში“, - განაცხადა ტყიბულის საავადმყოფოს ექიმმა იური ალიაშვილმა.

მძიმე რჩება ერთ-ერთი პირის მდგომარეობა. ის რეანიმაციულ განყოფილებაში მკურნალობს. ექიმის ინფორმაციით, მას სხეულის ზედა ნაწილისა და სასუნთქი გზების დამწვრობა აღენიშნება.

სხეულის დამწვრობა აღენიშნება კიდევ ოთხ პაციენტს. მათ კლინიკაში დამატებითი კვლევები უტარდებათ.

ტყიბულის შახტში აფეთქება გვიან ღამით მოხდა.