ფოტოზე დაბა მესტია: ზურაბ ფალიანის ქუჩა

დაბა მესტიაში აქტიურად მიმდინარეობს 15 (თხუთმეტი) შიდა ქუჩის რეაბილიტაციის პროექტი. ამ დროისთვის სარეაბილიტაციო სამუშაოების ნაწილი უკვე შესრულდა ფარჯიანის I და II ჩიხში, ნ. ჯაფარიძის, გ. ჯაფარიძის, ჯ. ხაფთანის, ა. ხერგიანის, ზ. ფალიანის, ჭ. ჩართოლანის, მ. გვარლიანის ქუჩებზე. აღნიშნულ ქუჩებზე მიმდინარეობს საბოლოო სარეაბილიტაციო სამუშაოები.

მესტიის მერიის ცნობით, დაწყებულია ბ. ხერგიანის, ი. გაბლიანის (სტადიონის მონაკვეთი), ვიტორიო სელას ქუჩების, დავით აღმაშენებლისა და ბეთლემის ჩიხების სარეაბილიტაციო სამუშაოები. პროექტის ფარგლებში დაიგება სენაკის ქუჩაც.

აღნიშნული სამუშაოების შესყიდვა, მესტიის მუნიციპალიტეტის მერიის მიერ, განხორციელდა 2019 წელს და შესრულებულია პროექტით გათვალისწინებული სამუშაოების 75 %. როგორც მესტიის მერიაში აცხადებენ, პროექტის მიმდინარეობის პროცესში, ქვეყანაში არსებული პანდემიური მდგომარეობიდან გამომდინარე, სამშენებლო მასალების ფასის ცვილლებებმა განაპირობა პროექტის საწყისი ღირებულების ზრდა. ამ მომენტისთვის პროექტის საერთო ღირებულება შეადგენს 6 198 469 ლარს.

გზების სარეაბილიტაციო სამუშაოებს ასრულებს შპს „თავადი+“ (ელექტრონული ტენდერი: NAT190014984). პროექტი გახლავთ მრავალწლიანი და დასრულდება 2022 წელს.

შიდა ქუჩების რეაბილიტაცია დაფინანსებულია საქართველოს რეგიონებში განსახორციელებელი პროექტების ფონდიდან, ადგილობრივი ბიუჯეტის მონაწილეობით.