„მინდა თითოეულს გულითადი მადლობა გითხრათ მოლოცვებისა და თქვენი სურვილებისათვის“, - ამის შესახებ საქართველოს ახლადდანიშნული საგანგებო და სრულუფლებიანი ელჩი მექსიკის შეერთებულ შტატებში, პანამის რესპუბლიკაში, კოსტა-რიკის რესპუბლიკაში, დომინიკის რესპუბლიკაში, ჰონდურასის რესპუბლიკაში, გვატემალის რესპუბლიკაში, სალვადორის რესპუბლიკაში და ბელიზში ზაზა გაბუნია Facebook-ის საკუთარ გვერდზე წერს.

„იყო შენი სახელმწიფოს საგანგებო და სრულუფლებიანი ელჩი, არის განუზომელი პატივი და განსაკუთრებული მდგომარეობა. იშვიათია ამაზე უფრო დიდი მისია და როლი შენი ქვეყნისა და ხალხის სახელით მსახურებისთვის.

რეგიონი, სადაც უახლოეს დღეებში ჩემი უფლებამოსილების განხორციელებას შევუდგები, ყოველთვის განსაკუთრებულად საინტერესო და ახლობელი იყო. პირველ რიგში მისი კულტურის, მისი ლიტერატურის გამო და მოხარული ვარ, რომ საქართველოს ინტერესების წარმოჩენისა და დაცვისათვის, სწორედ ლათინურ ამერიკაში მსახურების შესაძლებლობა მომეცა.

აქვე, მივესალმები ქართველ დიპლომატებს მსოფლიოს ყველა წერტილში - უზარმაზარია თქვენი ღვაწლი და შრომა. მახარებს ის ამბავი, რომ უკვე მეც ამ გუნდის წევრი ვარ.

დიპლომატიური მისია კი, რომლის ხელმძღვანელობის პატივი მერგო, საკუთარ უფლებამოსილებას ახორციელებს მექსიკის შეერთებულ შტატებში, პანამის რესპუბლიკაში, კოსტა-რიკის რესპუბლიკაში, დომინიკის რესპუბლიკაში, ჰონდურასის რესპუბლიკაში, გვატემალის რესპუბლიკაში, სალვადორის რესპუბლიკაში და ბელიზში.

გვისურვეთ წარმატებები, ჩემთან ერთად კი ჩვენს დიპლომატიურ გუნდსაც - ისინი დიდი რუდუნებითა და მონდომებით ასრულებენ საქმეს, ჩვენი სახელმწიფოს საქმეს ლათინურ ამერიკაში“, - წერს ზაზა გაბუნია.