საქართველოს კათოლიკოს-პატრიარქის მდივანი მიქაელ ბოტკოველი მხარს უჭერს სასულიერო პირებისა და მრევლის ნაწილის მოთხოვნას, რუსთაველის გამზირზე მდებარე თეოდოსი ჩერნიგოველის სახელობის ტაძრის შენობის დაბრუნებასთან დაკავშირებით. როგორც მან news.ge-სთან საუბრისას განაცხადა, საპატრიარქო, ცივილური მეთოდებით, ჩაერევა ეკლესიისთვის ქონების დაბრუნების პროცესში.

"თუ სასულიერო პირები იყვნენ იქ, ალბათ, იციან, რომ იქ ნამდვილად ეკლესია იყო. ხელისუფლებამ უნდა იფიქროს ყოფილი ეკლესიების დაბრუნებაზე მართლმადიდებელი ეკლესიისთვის. საპატრიარქო შეეცდება, რომ ცივილური მეთოდებით ჩერთოს პროცესში. ისე, როგორც კანონიერად ხდება, ეკლესიისთვის ქონების დაბრუნება ეტაპობრივად, უნდა დაუბრუნდეს ეკლესია კანონიერ მფლობელს", - აცხადებს მამა მიქაელი.

ცნობისთვის, რუსთაველის გამზირზე, წმ. თეოდოსი ჩერნიგოველის სახელობის ტაძრის შენობის დაბრუნების თხოვნით პრემიერმინისტრს რამდენიმე სასულიერო პირი და მრევლის ნაწილი მიმართავს. რუსთაველის გამზირის N48-სთან, სადაც "ტაოპრივატ ბანკი", კაფე "გალერი" და სხვა ოფისებია განთავსებული, სასულიერო პირებმა და მრევლმა დღეს წმინდა მღვდელმთავრის თეოდოსი ჩერნიგოველის ხსენების დღესთან დაკავშირებით პარაკლისი გადაიხადეს.

http://news.ge/ge/news/story/80329-botkoveli-eklesiisatvis-kafe-galeris-shenobis-dabrunebis-momkhrea