"გერმანიისთვის ნატო-ში გაწევრიანება პრობლემა არ ყოფილა, როცა ისიც საქართველოს მსგავსად ორად იყო გაყოფილი", - საქართველოს თავდაცვის სამინისტროს ინფორმაციით, ეს ლიტვის თავდაცვის მინისტრის იუზას ოლეკასის მთავარი გზავნილი იყო, თინათინ ხიდაშელთან შეხვედრაზე. ეს "იდეა" არახალია, იგი ქართულ პოლიტიკურ რეალობაში არაერთხელ გაუხმოვანებიათ, მაგრამ უცხოელი მინისტრის მხრიდან პირველად გაისმა, როგორც "რეკომენდაცია", რასაც მისი ქართველი კოლეგა "აღფრთოვანებით შეხვდა"?! საქმე ის გახლავთ, რომ საქართველოს შემთხვევაში "გერმანული სცენარი" ზედაპირული განსჯისას მეტად "მიმზიდველია", ხოლო თუ ღრმა ანალიზს გავაკეთებთ, მაშინ აშკარაა, რომ ამ სცენარს თუ გავყვებით შეასაძლოა ნატოში გავწევრიანდეთ, მაგრამ ქვეყნის ტერიტორიულ მთლიანობას ვერ აღვადგენთ!.. დიახ, ჩნდება საფუძვლიანი ეჭვი, რომ მავანთა მიერ (საქართველოს შიგნით თუ გარეთ!) "გერმანული სცენარის წამოწევა საქართველოსთვის", ერთგვარი "თავის გამართლებაა" იმისთვის, რომ მომავალში განაცხადონ, – აი, ხომ ხედავთ "გერმანული გზით ვიარეთ" და ნატოში გავწევრიანდით, მაგრამ ქვეყნის გამთლიანება, ანუ აფხაზეთის და ე.წ. სამხრეთ ოსეთის დაბრუნება ვერ შევძელითო!..


ლიტვის თავდაცვის მინისტრის "რეკომენდაციას" იზიარებენ ზოგიერთი ქართველი პოლიტიკოსები და ექსპერტები, ამიტომ შევეცდები, რომ მათ საფუძვლიანი და არგუმენტირებული ხედვა დავუპირისპირო, რათა გავაქარწყლო საქართველოს მთლიანობის აღდგენისათვის დამღუპველი "შინაური თუ გარეული რეკომენდაციები". დარწმუნებული ვარ, რომ 'გერმანული მაგალითი" საქართველოს გამთლიანებისათვის არ გამოდგება, მეტიც, იგი გამორიცხავს ამის შსესაძლებლობას! რატომ? იმიტომ, რომ გერმანიის შემთხვევაში საქმე გვაქვს სხვა პოლიტიკურ, ეთნიკურ, ფსიქოლოგიურ კონტექსტთან. დიახ, მეორე მსოფლიო ომში დამარცხების შემდეგ, ეთნიკურად ერთიანი გერმანელი ერი ორად იყო გაყოფილი გარეშე ძალების მიერ, რომლის საფუძველი "იდეოლოგია" გახლდათ (გფრ - დემოკრატიული, თავისუფალი სამყარო და გდრ - საბჭოთა, კომუნისტური ბლოკი), და რაც უმთავრესია, – არანაირი ეთნიკური სეპარატიზმი გერმანიაში არ არსებობდა!! ქართველ პოლიტიკოსებს "ხშირად ავიწყდებათ", რომ საქართველოში არსებულ ოსურ და აფხაზურ სეპარატიზმს რუსეთი კვებავდა წლების მანძილზე და ამ ეთნიკური სეპარატიზმის პერმანენტული ინსპირირება მანვე მოხერხებულად გამოიყენა და დღეს, სწორედ ამ ხალხების სეპარატისტულ განწყობებზე "დგას" რუსული სამხედრო საოკუპაციო ბაზები საქართველოს ორივე რეგიონში! რუსეთს საქრთველოს ორი სეპარატისტული რეგიონის "დამოუკიდებლობა აღიარებული" აქვს, რასაც ადგილი არ ჰქონდა გერმანიის ტერიტორიაზე, არც დემოკრატიულ გფრ–ში და არც სოციალისტურ გდრ–ში!..

ხიდაშელის და მისი თანამოაზრეების "აღფრთოვანება" ლიტვის თავდაცვის მინისტრის "რეკომენდაციასთან" დაკავშირებით, არც არის გასაკვირი, რადგანაც მათი პოზიცია ამ საკითხთან მიმართებაში ზუსტად ემთხვევა "ნაცმოძრაობის" ხედვას, როცა ისინი იყვნენ ხელისუფლებაში. ‘ნაციონალები“ არც მალავდნენ და შესაძლებლად მიაჩნდათ ის ვარიანტი, რომ საქართველოს ტერიტორია, რომელსაც აკონტროლებდა ქვეყნის ცენტრალური ხელისუფლება "გაწევრიანებულიყო" ნატო–ში, ხოილო აფხაზეთი და ცხინვალის რეგიონი, – რუსეთის "დაშლის შემდეგ"! დიახ, ამ "ვარიანტთან" დაკავშირებით ერთ–ერთმა მათგანმა (თუ არ ვცდები, დ.ბაქრაძემ) განაცხადა, რომ – "გერმანიაც ასე იყოო გაყოფილი და "მერე გაერთიანდაო" (სსრკ რომ დაიშალაო, ანუ, საქართველოს შემთხვევაში რუსეთის "დაშლას" უნდა ველოდოთო!)!?.. ეტყობა, ვერც ნაცმოძრაობის ლიდერები "ხვდებოდნენ იმას", რომ, ვიმეორებ, – გერმანიის შემთხვევაში ე რ თ ი ერი იყო ორად გაყოფილი გარეშე ძალების მიერ, და არანაირი ე თ ნ ი კ უ რ ი ს ე პ ა რ ა ტ ი ზ მ ი გერმანიაში არ არსებოდა და საუკუნეც რომ გასულიყო, ერთიანი გერმანელი ერი მაინც გააერთიანებდა გერმანიას!.. ჩვენს შემთხვევაში კი, მავანს "ავიწყდება", რომ სეპარატისტ აფხაზებს და ოსებს არანაირი სურვილი არა აქვთ, რომ "შემოგვიერთდნენ ერთიან საქართველოში" და მათი "აზრით", ჩვენთვის ოკუპირებულ ტერიტორიებზე ისინი "თავის დამოუკიდებელ სახელმწიფოს აშენებენ"?!.. მოკლედ, ღრმად ვარ დარწმუნებული, რომ ნატოში "ამდაგვარი რეკომენდაციით" გაწევრიანება, საქართველოს ხელისუფლებას (ქართველ ხალხს!) სამუდამოდ დააკარგვინებს ქვეყნის გამთლიანების, ანუ აფხაზეთის და ცხინვალის რეგიონის დაბრუნების შანსს!!!...


ჯუმბერ კირვალიძე,

პოლიტოლოგი