პრემიერი დარწმუნებულია რომ არავითარი დარღვევები არ გააჩნია და რომ "ნაციონალური მოძრაობის" ეგრეთ წოდებული ბრალდებები "სასაცილო და აბსურდულია".

მიუხედავად ასეთი დამოკიდებულებისა, ღარიბაშვილმა თქვა, რომ ის ამ საკითხს მაინც განმარტავს, არა ნაციონალური მოძრაობისთვის, არამედ, იმ ადამიანებისთვის, ვისაც ასეთი აბსურდის მოსმენის შემდეგ, შესაძლოა, "ჩემს მიმართ რაიმე კითხვები ან ეჭვები" გაუჩნდათ.

"მე პოლიტიკაში სუფთა ხელებით მოვედი და სუფთა ხელებით მინდა წავიდე. არაფერი არა მაქვს დასამალი, თუ რაიმე მაქვს, ყველაფერი არის განცხადებული. და თუ მექნება დასამალი, მე მარტივად დავიხურვ ქუდს და წავალ. არცერთი კითხვის არ მეშინია..." - განაცხადა მან "პოლიტიკის დროსთან" საუბარში.

პრემიერი გიორგი ზედელაშვილის ბიზნესაც შეეხო და განმარტა, რომ შს მინისტრის მოადგილის მამამ კომპანია "სერპანტინი" ჯერ კიდევ 2000 წელს დაარსა და ზედელაშვილმა ის მემვკიდრეობით მიიღო:

" ამ ადამიანის მამამ, ეს კომპანია 2000 წელს დააარსა, მაშინ არ არსებობდა არც ნაციონალური მოძრაობა, არც ღარიბაშვილი, მაშინ სტუდენტი ვიყავი... ბოლო ხუთი წლის განმავლობაში ამ ადამიანის ოჯახს - ეს ქონება მან მემკვიდრეობით მიიღო - შემოსავლის სახით მიღებული აქვს 60 მილიონი. ის ხელისუფლებაში მოვიდა უკვე შეძლებული, განსხვავებით კეზერაშვილისგან, მერაბიშვილისგან, თრგამაძისგან, ბოკერია მოვისმინე... მოვისმინე რომ ბოკერიას, თუ მისი მამის კომპანიებს აქვს 25 თუ 30 მილიონიანი ბრუნვა; ბაქრაძის სიმამრს 30 მილიონის ბრუნვა, გივი თარგამაძეს - 65 მილიონიანი ბრუნვა, ვანო მერაბივილს 300 მილიონზე მეტი... " - აცხადებს ღარიბაშვილი.

პრემიერი არ ადასტურებს ინფორმაციას იმის შესახებ რომ გიორგი ზედელაშვილის მემკვიდრეობით მიღებული კომპანია პრივილეგირებულ მდგომარეობაშია. მისი თქმით, კომპანიამ 4 პროექტი მოიგო და 7 წააგო. ღარიბაშვილის განმარტებით, ნაციონალების ლიდერებმა კაპიტალი დააგროვეს ხელისუფლებაში ყოფნის დროს, და ზედელაშვილი უკვე იყო შეძლებული როცა მოვიდა ხელისუფლებაში.

რამდენიმე ხნის წინ ნაციონალურმა მოძრაობამ პრემიერი ღარიბაშვილი ნეპოტიზმში დაადანაშაულა და გიორგი ზედელაშვილი იმ კორუფციული სქემის ნაწილად დაასახელა, რომელიც გზების მშენებლობის მიმართლებით მუშაობს და სერიოზული პრივილეგიებით სარგებლობს.

http://newposts.ge/?l=G&id=30626-%E1%83%A6%E1%83%90%E1%83%A0%E1%83%98%E1%83%91%E1%83%90%E1%83%A8%E1%83%95%E1%83%98%E1%83%9A%E1%83%98%2C+%E1%83%9B%E1%83%98%E1%83%9A%E1%83%98%E1%83%9D%E1%83%9C%E1%83%94%E1%83%A0%E1%83%98%2C+%E1%83%9C%E1%83%90%E1%83%AA%E1%83%98%E1%83%9D%E1%83%9C%E1%83%90%E1%83%9A%E1%83%94%E1%83%91%E1%83%98#.Uvqx-1GDH-s.facebook