ჩინეთი საოცარი პომპეზურობით აღნიშნავს ქვეყნის ხელისუფლების სათავეში „კომუნისტური პარტიის“ მოსვლიდან 70-ე წლისთავს. პეკინში სამხედრო აღლუმი იმართება, ქუჩები სავსეა ტანკებით, ანტი-სატანკო რაკეტებით, შეიარაღებული საჯარისო ნაწილებით, ასევე გამოფენილა დრონები და ავტომატურად მომუშავე წყალქვეშა სატრანსპორტო საშუალებებიც კი.

აღლუმი ტიანანმენის მოედანზე ქვეყნის პრეზიდენტმა სი ძინპინმა ჩაიბარა. ზუსტად იმავე ადგილას მდგარი სი ძინპინი, სადაც მაო ძედუნმა ჩინეთის სახალხო რესპუბლიკა გამოაცხადა, ქვეყნის უმაღლეს მმართველთა შორის ერთადერთია, რომელსაც მაოს მსგავსი კოსტუმი ეცვა. თავის მოკლე სიტყვაში სიმ ერთიანობას, მიმდინარე ბრძოლას და ჩინეთის შეუდრეკელ პროგრესს გაუსვა ხაზი.

„ქვეყნის სამხედრო ძალებმა მტკიცედ უნდა დიცვან ჩინეთის სუვერენიტეტი, უსაფრთხოება და განვითარების ინტერესები და მყარად უნდა დაუჭირონ მხარი მსოფლიო მშვიდობას“, - უთხრა სი ძინპინმა ტიანანმენის მოედანზე შეკრებილებს.

„ვერანაირი ძალა ვერ შეასუსტებს ჩინეთის სტატუსს და ვერ შეაჩერებს ჩინელ ხალხს და ერს წინ მიმავალი გზიდან“, განაცხადა ძინპინმა იმ ადგილიდან, საიდანაც მაომ 1949 წელს ჩინეთის სახალხო რესპუბლიკა გამოაცხადა.

ამის შემდეგ იგი ღია ავტომანქანით გავიდა სამხედრო აღლუმზე, ფეხზე მდგარი იშვიათად იქნევდა ხელს და საპასუხოდ ერთგულების შეძახილებს იღებდა.

სამხედრო ლიდერებმა განაცხადეს, რომ ეს არ არის „კუნთების თამაში“, მაგრამ აღნიშნეს, რომ „კომუნისტური პარტიის“ 70-წლიანი კონტროლის ზეიმი, დიდწილად ფოკუსირებულია სამხედრო ძლევამოსილებაზე.

სამხედრო აღლუმს ასეულობით მილიონი ჩინელი უყურებს ტელევიზიის პირდაპირ ეთერში, ხოლო ათასობით ადამიანი მსოფლის დანარჩენ ნაწილში ინტერნეტის მეშვეობით ადევნებს თვალყურს.

სახელმწიფო მედიის თანახმად, აღლუმის დასასრულს, მშვიდობის განსასახიერებლად, ცაში 70 000 მტრედს გაუშვებენ. ღამით კი, პეკინს ფოიერვერკები გაანათებს.