საქართველოს უახლესი ისტორიის ყველაზე გამორჩეული თარიღი 1989 წლის 9 აპრილი განსაკუთრებულად აღინიშნა წყალტუბოში. ტრაგედიიდან 30 წლის შემდეგ, მემორიალთან შეკრებილმა ადამიანებმა კიდევ ერთხელ გაიხსენეს სამშობლოს შეწირული გმირების ისტორიები და პატივი მიაგეს მათ ნათელ ხსოვნას.

მოეწყო მსვლელობა ჩოხოსნებისა და ახალგაზრდების მონაწილეობით, რომელსაც იმერეთში სახელმწიფო რწმუნებულის პირველი მოადგილე ზვიად შალამბერიძე, სახელმწიფო რწმუნებულის მოადგილე იოსებ ხახალეიშვილი, წყალტუბოს მუნიციპალიტეტის მერი გრიგოლ იოსელიანი, საკრებულოს თავმჯდომარის მოვალეობის შემსრულებელი პაატა ახალაძე და ადგილობრივი თვითმმართველობის წარმომადგენლები შუერთდნენ.

ჩირაღდნების, სანთლებისა და ტიტების თანხლებით, კიდევ ერთხელ გაიხსენეს 9 აპრილის სისხლიანი ქრონიკები, ეროვნული მოძრაობის ლიდერები, ქართველი ხალხის საოცარი ერთიანობის, სოლიდარობისა და სიმამაცის მაგალითები.

,,30 წელი გავიდა 9 აპრილის ტრაგედიიდან. ეს იყო პერიოდი, როცა მთელი საქართველო გაერთიანებული გახლდათ იმ ერთადერთი, სანუკვარი მიზნით, რასაც ქვეყნის დამოუკიდებლობა და თავისუფლება ჰქვია. მე მინდა მადლობა გადავუხადო იმ გმირებს, რომლებმაც თავი შესწირეს თავისუფლებისა დამოუკიდებლობის იდეას. ზუსტად ორი წლის შემდეგ 1991 წლის 9 აპრილს საქართველომ იზეიმა დამოუკიდებლობა და ეს არის სწორედ სისხლით მოპოვებული თავისუფლება, მე ქედს ვიხრი ჩვენი გმირების წინაშე და მადლობა მათ დამოუკიდებელი სახელმწიფოს შექმნაში შეტანილი განსაკუთრებული წვლილისათვის’’, განაცხადა მუნიციპალიტეტის მერმა, გრიგოლ იოსელიანმა.

,,დღეს თენდება 9 აპრილი დღე, რომელიც ძალიან მძიმე იყო 30 წლის წინ. დღე, როდესაც საქართველო იყო ერთიანი და დღე, როდესაც მთელი ქართველი მოსახლეობა იდგა ერთად, მაგრამ დღე, რომელიც სევდით არის აღსავსე, რომელმაც მოუტანა საქართველოს დამოუკიდებლობა. მადლობა მათ, ვინც სწორედ ამ დღეს თავი შესწირა სამშობლოს დამოუკიდებლობასა და თავისუფლებას'', აღნიშნა იმერეთში სახელმწიფო რწმუნებულის პირველმა მოადგილემ, ზვიად შალამბერიძემ.

,,საოცარი დრო იყო, ღირებულებების, მსოფლმხედველობის გადაფასების პერიოდი, ამ დღეებს ჰქონდა რაღაც საოცარი მუხტი. ყველა, ვინც იქ იდგა ეგონა, რომ ის იყო მთავარი, ის თუ იქ არ იქნებოდა, რაღაც მოხდებოდა, ამიტომ არ ტოვებდნენ ერთმანეთს, არ იღლებოდი, არ გციოდა, არ გშიოდა, არ გწყუროდა, მთავარი ერთად ყოფნა იყო. ამ ერთიანობამ, ამ ამაღლებულმა სულისკვეთებამ მოიტანა ის დიდებული წამები და მოიტანა გამარჯვება’’, ასე შეაფასა 1989 წლის დამოუკიდებლობისათვის ბრძოლა აქციის მონაწილემ, ჟურნალისტმა ირმა მარდალეიშვილმა.

ლიტერატურული პერფომანსის დასრულების შემდეგ, სიმბოლურად ფრანები გაუშვეს. მხარეთმცოდნეობის მუზეუმში კი, თემატური გამოფენა მოეწყო. ტრადიციულად ფოლკლორული ანსამბლის ,,ნადურის'' წევრებმა პატრიოტული სიმღერები შეასრულეს.

ინფორმაციას წყალტუბოს მერიის პრესსამსახური ავრცელებს.