საქართველოს სტრატეგიული ანალიზის ცენტრის (GSAC) დამფუძნებლი თორნიკე შარაშენიძე „რუსთავი 2"-თან დაკავშირებით, პარტია „ქართული ოცნება - დემოკრატიული საქართველოს" თავმჯდომარის მიერ გუშინ, 23 ოქტომბერს, სამი ტელეკომპანიის ჟურნალისტებთან პირისპირ შეხვედრისას გაკეთებულ განცხადებას ეხმაურება და ამბობს, რომ ბიძინა ივანიშვილი სხვა რეალობაში ცხოვრობს.

„ხანდახან მე მართლა მგონია, რომ ბიძინა ივანიშვილი დარწმუნებულია, რომ ქვეყანა ყვავის და „რუსთავი 2" ხატავს ყველაფერს შავ ფერებში. ეს, ალბათ, იმითაც არის გამოწვეული, რომ მას გარშემო არ დარჩა სიმართლის მთქმელი, არ დარჩა ისეთი, ვინც კრიტიკას გაუბედავს, განსხვავებულ აზრს შებედავს და ეს კაცი ცხოვრობს სხვა რეალობაში. მართლა ასე მგონია, სიმართლე გითხრათ, გუშინდელის ყურების მერე და ეს ძალიან საშიშია და ძალიან ცუდი, რადგან ადამიანმა, როგორც ჩანს, დაკარგა, სამწუხაროდ, შეხება რეალობასთან. ეს გამოიწვია იმან, რომ ის გავიდა ჩრდილში, დარწმუნებული იყო, რომ თავისი სახლიდან შეძლებდა მთავრობის და ქვეყნის მართვას. აშკარად, არ გამოვიდა ასე. ვერ მართავს სიტუაციას. ეს აისახა ყველაფერზე, მათ შორის, მის მიერ რეალობის აღქმაზე.

„რუსთავი 2-ს“ თურმე თუ გამოვრთავთ, როგორც ჩანს, ქვეყანა აყვავდება და ლარის კურსიც გამყარდება. მე გთავაზობთ ექსპერიმენტის სახით, რომ ერთი საათით გათიშოთ ეთერი, ლარის კურსი თუ გამყარდა, ვნახოთ, იქნებ, მართლა მართალია ბატონი ბიძინა", განუცხადა თორნიკე შარაშენიძემ „რუსთავი 2"-ს.

ბიძინა ივანიშვილის თქმით, „დღეს რომ გამორთო „რუსთავი 2“, ქვეყანაში აღმავლობისა და აღმშენებლობის მეტს ვერაფერს ვერ ნახავთ".