„ევროპული საქართველოს“ ერთ-ერთი ლიდერი, დეპუტატი გიგა ბოკერია ფიქრობს, რომ საქართველოში საპრეზიდენტო არჩევნების მეორე ტურის გამართვის საჭიროება იქნება და მეორე ტურში, ბოკერიას პროგნოზით, მათი ფავორიტი კანდიდატი, დავით ბაქრაძე გაიმარჯვებს, სალომე ზურაბიშვილი კი შესაძლოა, მეორე ტურის მიღმაც კი დარჩეს.

„ქართველმა ხალხმა დაინახა, რომ ამ ადამიანის სახელისუფლებო სადავეებთან მიშვება დამატებითი საფრთხისა და ზიანის მომტანია. დარწმუნებული ვარ, ხალხი არჩევნებზე მოვა. უარეს შემთხვევაში, მეორე ტური იქნება და ჩვენი ფავორიტი სალომე ზურაბიშვილს დაამარცხებს, თუ სალომე ზურაბიშვილი მეორე ტურში საერთოდ გავა“, განაცხადა გიგა ბოკერიამ ჟურნალისტებთან საუბრისას.

მისივე თქმით, ბიძინა ივანიშვილის გუნდის ერთადერთი იმედი ისაა, რომ ხალხი არჩევნებზე არ მივა და ხელისუფლება ადმინისტრაციული რესურსით, მოსყიდვითა და დაშინებით შეძლებს ვითარების გარდატეხას.