პრეზიდენტის სასახლეში გიორგი მარგველაშვილთან, შემდეგ კი შეწყალების კომისიის წევრებთან გამართული შეხვედრის დასრულების შემდეგ, სასჯელაღსრულების და პრობაციის მინისტრმა, კახა კახიშვილმა განაცხადა, რომ კომისიის მუშაობა გაფართოვდება და მასში სამინისტროს წარმომადგენელი ჩაერთვება იმისათვის, რომ უწყებებს შორის კოორდინაციის პრობლემა არ არსებობდეს. ამასთან, კომისიას მიეცემა შესაძლებლობა, მრავალმხრივ შეისწავლოს საქმის ყველა გარემოება მანამ, სანამ მიიღებს გადაწყვეტილებას

გასულ კვირას თბილისში, ბარნოვის ქუჩაზე თავისი გერის, ახალგაზრდა ქალის მკვლელობაში ეჭვმიტანილი ვეფხია ბაქრაძის 2016 წელს პრეზიდენტ მარგველაშვილის მიერ შეწყალების შესახებ კომენტირებისას კი მინისტრმა კახიშვილმა უარყო ინფორმაცია იმის თაობაზე, რომ უწყებას განსხვავებული ინფრომაციები ჰქონდა მიწოდებული ე.წ. უდოს ჯგუფისთვის და პრეზიდენტის ადმინისტრაციისა და შეწყალების კომისიისთვის.

„ამ შემთხვევაში, სასჯელაღსრულებისა და პრობაციის სამინისტრო რეკომენდაციას არ იძლევა კონკრეტულად ვინმეს გათავისუფლება-არგათავისუფლებაზე. ეს არის ინტერვიუს სახით მოცემული ინფორმაცია, თუ რა განუცხადა სოციალურ მუშაკს და ფსიქოლოგს კითხვებზე, კონკრეტულად, კონკრეტულ კითხვებზე მსჯავრდებულმა. ასეთი ტიპის ინფორმაციები იგზავნება ხოლმე შეწყალების კომისიაში - პირობით ვადამდე ადრე გათავისუფლების კომისიაში. რომ იყოს გადაწყვეტილება მაქსიმალურად ობიექტური, ამიტომაც ვმუშაობთ ისეთი ტიპის მექანიზმების დანერგვაზე, რომ უკვე კომისიას მიეცემა შესაძლებლობა, მრავალმხრივ, არგუმენტირებულად, ობიექტურად შეისწავლოს საქმის ყველა გარემოება მანამ, სანამ მიიღებს გადაწყვეტილებას ან შეწყალების თაობაზე, ან შეწყალების უარზე, იმიტომ რომ ორივე გადაწყვეტილება შეიძლება იყოს მტკივნეული“, განაცხადა კახიშვილმა.