მე ვულოცავ ირმა ინაშვილს და „პატრიოტთა ალიანსს" რომ მთლიანი ლუსტრაცია გააკეთეს რაც არიან რეალურად და რა ოპოზიციური ძალაც არის, აღნიშნული განცხადება ბორჯომის საკრებულოს უკვე ყოფილმა თავმჯდომარემ, ზაზა ჩაჩანიძემ მისი იმპიჩმენტის შემდეგ გააკეთა.

„მე მინდა ჩემ ყოფილ მოადგილეს, გიორგი გოგიჩაიშვილს მოვუწოდო, გიორგი ისედაც დაგნიშნავენ, ამ თამაშში ძალიან თავს ნუ მოიჭრი, ხუთი შვილის მამა ხარ. უბრალოდ, ჩვენ გვისაუბრია ამ თემებზე და რაღაც გაუგნებული სახით ნუ აცხადებ, რომ ეს არის თამაშები - დაგნიშნავენ, ნუ ნერვიულობ, ნუ გააკეთებ იმას, რომ ამ ქალაქში აღარ გამოგეყოფოდეს თავი", განუცხადა „რუსთავი 2"-ს ზაზა ჩაჩანიძემ.

ბორჯომის მუნიციპალიტეტის საკრებულოს თავმჯდომარე თანამდებობიდან გადააყენეს.

ფარულ კენჭისყრაში მონაწილე 21 დეპუტატიდან ზაზა ჩაჩანიძის თანამდებობაზე დარჩენის სასარგებლოდ ხმა 2-მა, თანამდებობიდან გათავისუფლების სასარგებლოდ კი, 19-მა დეპუტატმა მისცა.

დღევანდელ სხდომას არ დასწრებიან და შესაბამისად, კენჭისყრაში მონაწილეობა არ მიუღიათ „ერთიანი ნაციონალური მოძრაობის”, „ევროპული საქართველოს” და „ლეიბორისტული პარტიის“ წარმომადგენლებს.

21 მარტს საკრებულოს აპარატში დარეგისტრირდა განცხადება, რომლითაც საკრებულოს 15 დეპუტატი ზაზა ჩაჩანიძის გადადგომას ითხოვდა. აქედან 13 „ქართული ოცნების“, ხოლო 2 „პატრიოტთა ალიანსის“ წევრი იყო. თავმჯდომარის იმპიჩმენტისთვის საკრებულოს დეპუტატების სიითი შემადგენლობის ნახევარზე მეტია საჭირო.