წყალტუბოს პირველ საჯარო სკოლაში, 1921 წლის 25 თებერვალს, საბჭოთა ოკუპაციის დღესთან დაკავშირებით, ქართულ ენასა და ლიტერატურაში სამოდელო გაკვეთილი ჩატარდა.

საუკუნის წინ განვითარებული ტრაგიკული ისტორიული მოვლენების შესწავლისა და ფასეულობათა შეჯამების მიზნით, მეშვიდე კლასის მოსწავლეებმა წამყვანი მასწავლებლის, ასოცირებული პროფესორის ფაქიზო ფანჩულიძის ხელმძღვანელობით, გაანალიზეს საქართველოში წითელი არმიის შემოჭრისა და დამოუკიდებლობისთვის ბრძოლაში კოჯორ-ტაბახმელას მისადგომებთან დაღუპული იუნკერების სამაგალითო გმირობის თემაზე არსებული ისტორიული, პუბლიცისტური და ლირიული მასალები; წარმოადგინეს საინტერესო პრეზენტაციები: დამოუკიდებლობის გამოცხადების, დამოუკიდებელი საქართველოს საშინაო-საგარეო პოლიტიკის, 1921 წლის თებერვალში ქვეყანაში წითელი არმიის შემოსვლის საკითხებზე; წაიკითხეს პაოლო იაშვილისა და კოტე მაყაშვილის ცნობილი ლექსები: „25 თებერვალი“, „მაროს“, მიხეილ ბასილაძის პუბლიცისტური სტატია: „დაუმარცხებელი ასეული“.

გაკვეთილზე სხვადასხვა აქტივობებითა და ჯგუფური მუშაობის მეთოდით წარმოჩინდა საქართველოს ეროვნული საბჭოს მიერ დამოუკიდებლობის გამოცხადებიდან (1918 წლის 26 მაისი) სამ წელში, 1921 წელს საბჭოთა რუსეთის მიერ ძალის გამოყენებით საქართველოს დაპყრობის ქრონიკები, მომავალი თაობის წარმომადგენლებმა აღნიშნეს, რომ ახალგაზრდა იუნკერების თავდადებას უკვალოდ არ ჩაუვლია, რომ „სიცოცხლე არც დაბადებით იწყება და არც სიკვდილით მთავრდება“.

ინფორმაციას წყალტუბოს მუნიციპალიტეტის მერიის პრეს-სამსახური ავრცელებს.