ჩრდილო-დასავლეთ სირიაში, აფრინის რეგიონში ქურთული მილიციის წინააღმდეგ მებრძოლ თურქეთის არმიას ყველაზე საბედისწერო დღე გაუთენდა - მოკლულია 7 თურქი ჯარისკაცი, 5 მათგანი მათ ტანკზე თავდასხმის შედეგად დაიღუპა.

BBC-ის ცნობით, თურქეთის პრემიერ მინისტრმა ბინალი ილდირიმმა აღთქმა დადო, რომ ქურთ მებრძოლებს „ორჯერ ძვირად დაუჯენს“ ამ ქმედებას. მოგვიანებით თურქულმა სამხედრო თვითმფრინავებმა აფრინის ჩრდილო-აღმოსავლეთ ქალაქში ქურთული სამიზნეები დაბომბეს.

სამხედრო ოპერაცია, რომელსაც მეტასახელად „ზეთისხილის რტო“ დაერქვა, თურქეთმა 20 იანვარს წამოიწყო და მისი მიზანია, ქურთი მებრძოლები აფრინის რეგიონიდან განდევნოს.

თურქეთი სირიაში მოქმედ ქურთულ მილიციას, „სახალხო დაცვის შენაერთებს“, რომელსაც მხარს ამერიკის შეერთებული შტატები უჭერს, ტერორისტულ დაჯგუფებად და ქვეყანაში აკრძალულ „ქურთ მუშათა პარტიის“ გაგრძელებად მიიჩნევს - პოლიტიკური ორგანიზაციის, რომელიც სამი ათეული წელია, რაც სამხრეთ-აღმოსავლეთ თურქეთში ქურთული ავტონომიის შექმნისათვის იბრძვის.

თურქეთის ულტიმატუმი აშშ-ს 

შეერთებულმა შტატებმა სირიაში ქურთული მილიციისთვის შეიარაღების მიწოდების შეწყვეტის პირობა დადო, განაცხადა თურქეთმა 27 იანვარს და მოუწოდა ვაშინგტონს დაუყოვნებლივ გაიყვანოს თავისი ჯარები სირიის ქალაქ მანბიჯიდან, რომელზე იერიშის მიტანასაც თურქული სამხედრო ძალები აპირებენ.

როგორც 28 იანვარს გამოქვეყნებულ „როიტერსი“-ს სტატიაშია აღნიშნული, ჩრდილო-დასავლეთ სირიის აფრინის რეგიონში ქურთული მილიციის წინააღმდეგ თურქეთის საჰაერო და სახმელეთო იერიშებმა სირიის 7-წლიან სამოქალაქო ომში, რომელშიც სხვადასხვა ძალები იყვნენ ჩართული, ახალი ფრონტი გახსნა და დაძაბა ურთიერთობები NATO-ს მოკავშირე ვაშინგტონთან.

ანკარა ქურთულ მილიციას - „სახალხო დაცვის ქვედანაყოფებს“ ტერორისტებად და თურქეთში კანონგარეშედ გამოცხადებულ „ქურთთა მუშათა პარტიის“ გაგრძელებად მიიჩნევს და აღშფოთებულია შეერთებული შტატების მიერ ქურთული მილიციისადმი შეიარაღების მიწოდებით და წვრთნების მხრივ მხარდაჭერით. ქურთმა მებრძოლებმა დიდი წვლილი შეიტანეს სირიაში „ისლამური სახელმწიფოს“ წინააღმდეგ აშშ-ის მეთაურობით წარმართულ ბრძოლებში, წერს „როიტერსი“.

20 იანვარს დაწყებული ოპერაციიდან, რომელსაც ანკარამ მეტსახელად „ზეთისხილის რტო“ შეარქვა, 8 დღის შემდეგ პრეზიდენტმა რეჯეფ თაიფ ერდოღანმა განაცხადა, რომ თურქული ძალები შესაძლოა, აღმოსავლეთისკენ, ქალაქ მანბიჯისკენ დაიძრნენ, რაც პოტენციურად შეერთებულ შტატებთან კონფრონტაციას გამოიწვევს, რადგან ამ ტერიტორიაზე აშშ-ს თავისი ჯარები ჰყავს განლაგებული.

აშშ-ის პრეზიდენტის მრჩეველმა ეროვნული უსაფრთხოების საკითხებში, ეიჩ არ მაკმასტერმა ერდოღანის წარმომადგენელს, იბრაჰიმ კალინს სატელეფონო საუბრისას უთხრა, რომ შეერთებული შტატები უკვე აღარ აწვდის ქურთულ მილიციას - „სახალხო დაცვის ქვედანაყოფს“ - შეიარაღებას, განაცხადეს თურქეთის პრეზიდენტის ოფისში.

„ხაზი გაესვა, რომ ყურადღება უნდა მიექცეს თურქეთის უსაფრთხოების კანონიერ წუხილებს. გამოიხატა თანხმობა, რომ განხორციელდება მჭიდრო კოორდინაცია იმისათვის, რომ თავიდან იქნეს აცილებული გაუგებრობები“, ნათქვამია თურქეთის პრეზიდენტის ოფისის მიერ გავრცელებულ განცხადებაში.

როგორც „როიტერსი“ წერს, მოსალოდნელია, რომ შეთანხმება ანკარას მიერ აღქმული იქნება, როგორც მნიშვნელოვანი დიპლომატიური გამარჯვება მას შემდეგ, რაც იერიშები იქნა წამოწყებული, რომელშიც აშკარაა, რომ თურქულმა ჯარებმა და მათმა ამბოხებულმა სირიულმა მოკავშირეებმა პოზიციები მოკრძალებულად წასწიეს წინ მაშინ, როცა თავსხმა წვიმებმა და ცუდმა მეტეოროლოგიურმა პირობებმა საჰაერო დარტყმების განხორციელება და სახმელეთო ოპერაციების მხრივ პროგრესი შეაფერხა.

თურქეთის საგარეო საქმეთა მინისტრმა განაცხადა, რომ შეერთებულმა შტატებმა თავისი დაპირება კონკრეტული ქმედებით უნდა დაამტკიცოს, რაც მანბიჯის მიდამოებიდან მისი ჯარების დაუყოვნებელ გაყვანას უნდა მოიცავდეს.

„შეერთებულმა შტატებმა უნდა გაწყვიტოს თავისი კავშირები ტერორისტულ ორგანიზაციასთან და იმოქმედოს ისე, რომ მათ [ტერორისტებმა] თავიანთი იარაღი სრულად დაყარონ. მათ [ამერიკელებმა] უნდა ამოიღონ იარაღი, რომელიც მათ მისცეს, ისინი უნდა გავიდნენ მანბიჯიდან დაუყოვნებლივ“, უთხრა მევლუდ ჩავუშოღლუმ რეპორტიორებს 27 იანვარს.

შეერთებული შტატების სახელმწიფო დეპარტამენტს აღნიშნულთან დაკავშირებით ჯერჯერობით კომენტარი არ გაუკეთებია.

20 იანვრის ოპერაციის დაწყების შემდეგ, თურქეთმა და მისმა „თავისუფალი სირიული არმიის“ მეამბოხე მოკავშირეებმა 28 იანვრამდე, საერთო ჯამში 394 მებრძოლო მოკლეს, განაცხადა ერდოღანმა. მისივე თქმით, თურქეთმა და „თავისუფალი სირიული არმიის“ მეამბოხე დანაყოფებმა ერთად, ასევე 28 იანვრის მონაცემებით, 20 ადამიანი დაკარგეს. 

რეჯეფ თაიფ ერდოღანმა ქალაქ კოჯაელში სიტყვით გამოსვლისას თქვა, რომ თურქეთის არმია შესაძლოა სირიის ტერიტორიის სიღრმეში, პროვინცია იდლიბამდე შევიდეს. 

მან აღნიშნა, რომ აფრინში სამხედრო ოპერაცია გრძელდება. „თუკი ალაჰი ნებას დაგვრთავს, ჩვენ იდლიბამდე მივალთ“, განაცხადა ერდოღანმა.