ვლადიმერ პუტინმა მთავრობას 2018 წლის 1-ლი იანვრიდან რუსეთის შრომისუნარიანი მოქალაქეებისთვის შრომითი ანაზღაურების მინიმალური ოდენობის ახლანდელი საარსებო მინიმუმის 71- 72%-დან 85%-მდე გაზრდის და 2019 წელს მინიმალური ხელფასის ოდენობის საარსებო მინიმუმთან გათანაბრების წინადადებით მიმართა და დაავალა მთავრობას, შესაბამისი კანონპროექტი, მომავალი სამი წლის ფედერალური ბიუჯეტის პროექტთან ერთად, სახელმწიფო სათათბიროში იქნეს შეტანილი.

როგორც  სააგენტო „რია ნოვოსტი“ წერს, მთავრობის წევრებთან შეხვედრისას პუტინმა გაიხსენა, რომ 2016 წელს შრომითი ანაზღაურების მინიმალური ოდენობა ორჯერ გაიზარდა: 1-ლი იანვრიდან და 1-ლი ივლისიდან. ამჟამად შრომითი ანაზღაურების მინიმალური ოდენობა 7,8 ათას რუბლს (დაახლოებით 136 აშშ დოლარი - 335 ლარი) შეადგენს - საარსებო მინიმუმის თითქმის 72%-ს.

„ჩვენ უნდა გადავწყვიტოთ პრინციპული ამოცანა - შრომითი ანაზღაურების მინიმალური ოდენობა საარსებო მინიმუმს გავუთანაბროთ და გადავლახოთ მდგომარეობა, როცა მინიმალური შესაძლო ხელფასი მოქალაქეთა ძირითად ხარჯებსაც კი ვერ ფარავს“, განაცხადა რუსეთის პრეზიდენტმა.