ბორჯომის ხეობაში გაჩენილი ხანძრის ჩაქრობაში რუსული მხარის მონაწილეობის შესახებ საკითხის კომენტირებისას რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ პარასკევს განაცხადა, რომ მოსკოვი „დაუყოვნებლივ გამოეხმაურა თბილისიდან თხოვნას ბორჯომ-ხარაგაულის ეროვნულ პარკში ხანძრის ჩაქრობაში დახმარებასთან დაკავშირებით“, თუმცა „ქართულმა მხარემ მადლობა გადაგვიხადა და გვაცნობა, რომ ხანძრის კერები ლოკალიზებული იყო, და ჩვენი დახმარების საჭიროება არ არსებობდა“.

„მიმდინარე სეზონზე რუს მაშველებზე მოთხოვნა მთელ რეგიონში დიდია. (ცოტა ხნის წინ მათ მონაწილეობა მიიღეს სომხეთის ტყეში გაჩენილი ხანძრის ჩაქრობაში, გრძელდება ბრძოლა ვოლგოგრადის ოლქში, სტეპების ხანძრის წინააღმდეგ). მიუხედავად ამისა, ჩვენ დაუყოვნებლივ გამოვეხმაურეთ თბილისიდან თხოვნას ბორჯომ-ხარაგაულის ეროვნულ პარკში ხანძრის ჩაქრობაში დახმარებასთან დაკავშირებით. ამ მიზნით გამოიყო რუსეთის საგანგებო სიტუაციების სამინისტროს თვითმფრინავი „Ил-76“. ამის შემდეგ, ქართულმა მხარემ მადლობა გადაგვიხადა და გვაცნობა, რომ ხანძრის კერები ლოკალიზებული იყო, და ჩვენი დახმარების საჭიროება არ არსებობდა.

„ჩვენ გულწრფელად ვუსურვებთ მეზობლებს რაც შეიძლება სწრაფად შეძლონ ხანძრის ლიკვიდირება. ხოლო მათ არაჯანსაღ ფანტაზიებზე კომენტირებას, რომელთათვისაც თვით ბუნებრივი უბედურებაც კი, საკუთარ ქვეყანაში, მხოლოდ მორიგი საბაბია ანტირუსული ინსინუაციებისთის, ზედმეტად მივიჩნევთ“, განაცხადა მარია ზახაროვამ.