შინაგან საქმეთა სამინისტროს საგანგებო სიტუაციების მართვის სააგენტოს განცხადებით, ატენის ხეობაში ხანძარი ლოკალიზებულია.

გორის მუნიციპალიტეტის სოფელ ზემო ბოშურის მიმდებარე ტერიტორიაზე, ატენის ხეობაში, სადაც ტყეში გაჩენილ ხანძარს რამდენიმე საათი ებრძოდნენ, მას შემდეგ რაც საქართველოს პრემიერ მინისტრმა გიორგი კვირიკაშვილმა საქართველოს პრეზიდენტს, გიორგი მარგველაშვილს ქვეყნის რეგიონებში გაჩენილი ხანძრის ლიკვიდაციის მიზნით, „სამხედრო ძალების გამოყენების წარდგინებით“ მიმართა, თავდაცვის მინისტრი ლევან იზორია ჩავიდა.

მან სტიქიის ზონაში ხანძრის სალიკვიდაციო სამუშაოებში თავდაცვის სამინისტროს გორის პირველი ქვეითი ბრიგადის 250 ჯარისკაცის ჩართვის შესახებ გააკეთა განცხადება.

მისივე თქმით, აღნიშნულ ტერიტორიაზე ხანძრის სრული ლიკვიდაციის შემდეგ, თუ ბორჯომის ხეობაში ისევ შენარჩუნებული იქნება ხანძრის კერები, თავდაცვის სამინისტრო სამხედრო ძალების მობილიზებას იქაც მოახდენს.

ცეცხლის შემდგომი გავრცელების თავიდან აცილების მიზნით სპეციალური თხრილები მოეწყო.

საქართველოს პრემიერ მინისტრის, გიორგი კვირიკაშვილის დავალებით, ატენის ხეობაში გაჩენილი ხანძრის ჩასაქრობად მძიმე ტექნიკა და ცოცხალი ძალა გაიგზავნა.

„საგანგებო შტაბის წევრები ღებულობენ ინფორმაციას ატენის ხეობაში გაჩენილი ხანძრის შესახებ. პრემიერ მინისტრის დავალებით ხეობაში უკვე გაიგზავნა მძიმე ტექნიკა და ცოცხალი ძალა“, ნათქვამია საგანგებო შტაბის ინფორმაციაში.