სამტრედიის მუნიციპალიტეტში 2015–2016 წლებში გაზიფიცირების მასშტაბური სამუშაოები განხორციელდა, ასევე სარემონტო სამუშაოები ჩაუტარდა საჯარო სკოლებსა და სკოლამდელი აღზრდის დაწესებულებებს, რაზეც ჯამში მილიონობით ლარი დაიხარჯა. ამის შესახებ Guardian.ge–ს სამტრედიის მუნიციპალიტეტის გამგებელმა, ვალერიანე ფოცხვერიამ განუცხადა.

მისი ინფორმაციით, მუნიციპალიტეტში სულ 31 სოფლის გაზიფიცირებისათვის 222,7 კილომეტრი საშუალო და დაბალი წნევის გაზსადენი აშენდა, სამუშაოებისათვის 5,2 მილიონი ლარი დაიხარჯა, რის შედეგადაც 4 000-მდე პოტენციურ აბონენტს ბუნებრივი აირის ქსელში ჩართვის შესაძლებლობა მიეცა.

გარდა ზემოთ აღნიშნულისა, მუნიციპალური განვითარების ფონდის დაფინანსებით, უკვე განხორციელდა ქუთაისი-ხონი-სამტრედიის ავტომაგისტრალის 5–კმ-იანი მონაკვეთის რეაბილიტაცია, რაზეც 5 211 964 ლარი დაიხარჯა. ასფალტ-ბეტონის საფართან ერთად აღნიშნულ გზაზე მოეწყო არხები, ბოგირები და მოსაცდელები.

ვალერიანე ფოცხვერიას განცხადებით, არაერთ საჯარო სკოლაში გამოიცვალა კარ–ფანჯრები, სახურავები, გარემონტდა სასკოლო ოთახები, დამონტაჟდა ცენტრალური გათბობის სისტემები, მოეწყო წყალგამტარი არხები, საპირფარეშოები და სანიაღვრე არხები. სამტრედიის მუნიციპალიტეტში არსებულ 33 საჯარო სკოლაში 2014-2016 წლებში ჯამში განხორციელდა 1 737 736 ლარის სარეაბილიტაციო სამუშაოები.

ასევე 10–ზე მეტ საბავშვო ბაღში შეიცვალა და რეაბილიტაცია ჩაუტარდა სველ წერტილებსა და სამზარეულოებს რაზეც რეგიონული განვითარების ფონდიდან სამუშაოები 288 345 ლარი დაიხარჯა.