ბიძინა ივანიშვილს იმერეთში პაატა ბურჭულაძის მოძრაობასთან დაკავშირებითაც დაუსვეს შეკითხვა. ერთ–ერთი გამოცემის წარმომადგენლის მიერ დასმულ შეკითხვაზე, – ლევან ბერძენიშვილის თქმით, ამ ადამიანების გაერთიანება (პაატა ბურჭულაძე და მასში შემავალი ბლოკი) ვერ მოხდებოდა, რომ არა ერთი კონკრეტული ადამიანი და ამ ადამიანად მან მოგიხსენიათ თქვენ და ასევე აღნიშნა ის, რომ "გიჩის" ერთ–ერთი დამფინანსებელი ბრძანდებით თქვენ, რა შეგიძლიათ ამასთან დაკავშირებით, რომ გვითხრათ? – ყოფილმა პრემიერ მინისტრმა ასეთი პასუხი გასცა:

"ბერძენიშვილი ბრძანებს, რომ ასეთი არაბუნებრივი გაერთიანება ვერ მოხდებოდაო. პირველ სამეულზე ამბობს, როდესაც კუბლაშვილი და ვაშაძე და კაციტაძე გაერთიანდნენ. ამაზე ბუნებრივი გაერთიანება მე ვერც კი წარმომიდგენია, რომ არ დაგიმალოთ. რანაირად შეიძლება კუბლაშვილის და ვაშაძის გაერთიანება იყოს არაბუნებრივი, და კაციტაძისაც. თუ გახსოვთ თქვენ, გამყრელიძემ პოლიტიკა დატოვა მხოლოდ იმ ნიშნით, რომ ლამის მთელმა საზოგადოებამ გაიგო, რომ "ახალი მემარჯვენეები" იყვნენ ფსევდო ოპოზიციური პარტია და ეს იყო "ნაციონალური მოძრაობის" შემადგენელი ნაწილი. დღეს ერთადერთი ასეთი დარჩა "ლეიბორისტული პარტია" და იქედან დანარჩენები, "ქრისტიან–დემოკრატებმაც" ნახა რომ ყველა საფუძველი გამოეცალა, ჩაიშალა და ნათელაშვილს წასასვლელი არსად არ ჰქონდა იმიტომ, რომ მაგაზე კომპრომატები აქვთ უამრავი და დღესაც ამუშავებენ მაგას ისევ "ნაცები", კაციტაძეც იყო "ნაციონალური მოძრაობის" წევრი ჩვეულებრივად და ამაზე ბუნებრივი გაერთიანება რა შეიძლებოდა, რომ ყოფილიყო. ეს ვთქვათ, ასეთი ჩახლართული სიტუაციები და ამისი ხელწერა გახლავთ სააკაშვილის, ყოველთვის ცდილობდა საზოგადოების მოტყუებას. მადლობა ღმერთს, რომ ეს კარგად გაირკვა, ასევე კარგად გაირკვა ბურჭულაძეზე. რას ნიშნავს არაბუნებრიობა, რაღაც ვერ გამიგია, არასერიოზული განცხადებაა. ბურჭულაძის პირველივე განცხადებები გაიხსენეთ რომ მოვიდა, მერე რა არაბუნებრივად მიაჩნია ის, რომ სააკაშვილთან უკრაინაში რამდენჯერ ჩასულა და ძირითადად იქ დადის ეს კაცი, ფოტოები გამოქვეყნდა, ჩახუტებული სააკაშვილთან. მე სამი წელიწადია არ მინახავს ეგ კაცი, ნაწყენი ვარ რომ არ დავმალო და ვიყავი ნაწყენი იმიტომ, რომ თავის დროზე, როდესაც ვთხოვე, რომ გვერდით დაგვიდექით, უამრავი ფული მოითხოვა მაშინ და შეუარცხყოფილი იყო რა თქმა უნდა, უარი ვუთხარი, იმის შემდგომ დაბადების დღე, 60 წლისთავი სამჯერ გადაიხადა 60 წლისთავი 3 წლის განმავლობაში და არც ერთჯერ არ მივსულვარ", – განაცხადა ბიძინა ივანიშვილმა.