დუშეთის მუნიციპალიტეტში სამძებრო სამუშაოები დასრულდა - მაშველებმა ხადას ხეობაში დაკარგული 4 წლის ბავშვი გარდაცვლილი იპოვეს. აღნიშნულ ინფორმაციას imedinews-ი ავრცელებს.

მარნეულის მუნიციპალიტეტში მცხოვრები ამერიკელი ცოლ-ქმარი რაიან და ლორა სმიტები, 4 წლის ვაჟთან ერთად, ხადას ხეობაში 6 ივლისს გაუჩინარდნენ, 7 ივლისს კი, ცოლ-ქმარი გარდაცვლილი იპოვეს.

მათ ორმაგი მოქალაქის სტატუსი ჰქონდათ მინიჭებული და რამდენიმე წელია, რაც საქართველოში ცხოვრობდნენ.

ვრცელდებოდა ინფორმაცია, რომ გარდაცვლილებს ძალადობის ნიშნები არ აღენიშნებოდათ, თუმცა, მოგვიანებით, მკვლელობის ვერსიაც გაჩნდა.

imedinews-ი ადგილობრივებზე დაყრდნობით იტყობინება, რომ ოჯახის წევრების მკვლელობაში ეჭვმიტანილი დაკავებულია.